Bënë bùten

Akcjô romana Bënë bùten dzeje sã na przełómanim szescdzesątëch i sétmëdzesątëch lat XX wiekù, to je wnenczas, czej aùtór (ùrodzony w 1956 rokù) przeżiwôł swòje dzecné lata w Lëpùszu i òkòlim. W ksążce je widzec i czëc pòmión jegò żëcowëch doswiôdczeniów, a sóm Stanisłôw Janka pòdczorchiwô, że wiele je w ti pòwiescë aùtiobiograficznëch mòtiwów.

Przédny heroja Ceszk Drgas je sënã szewca i mieszkô w kaszëbsczi wsë – Dibòwie. W romanie je òpisóné szczestlëwé, chòc dosc biédné dzectwò Ceszka, jegò relacje ze starszima, drëchama ze szkòłë i szkólnyma. Nie felëje wëjimków tikającëch sã kaszëbiznë, jakô je wôżnym dzélã żëcégò niejednëch bòhaterów ksążczi. Jak w kòżdim romanie Janczi, téż w Bënë bùten wôżné je dozdrzeniwanié heroji dokazu. Nie je òno przemikłé cerpienim i kòmùdą, bò knôp mô wkół se kòchającëch starszich i wiele żëcznëch lëdzy, a Dibòwò je pòkôzóné wnet jak miticznô szczestlëwô Arkadiô.

Nônowszô pòwiesc jednégò z nôwikszich méstrów kaszëbsczi lëteraturë to wôrtnô lektura dlô tëch, co chcą pòznac warënczi, w jaczich żëlë lëdze na Kaszëbach w cządze PRL-u, ale téż dlô wszëtczich lubòtników dobri prozë.